صعب تكتب ألم

صعب تكتب الم محسوس ، أيس والقلم كسره

فلا تگدر توصف جروح ، اذا بيك الألم جمره

ولا تكتب على الاوراق ، جرح اكتب على الشفره

لأن من ينجرح ويشوف ، يحس بيك الذي يقره

توصفله ويصيح الله ، وخوش يوصف بشعره

مثل اعمه بدرس الوان ، أبد ما توصل الفكره

تسولف للگعد مرتاح ، ولا ضايگ غصص مره

وتعزف بالوتر الحان ، ونايك لن خلص صبره

وانته بنص جمع طرشان ، وعزفك اطرم يفسره

ولا تگدر تفزز ناس ، نامت من شبع بطره

وخلي الي ينام ينام ، وكلمن ساكن بگبره

لسانك بالصمت داويه ، وجرحك بالصبر جبره

كلامك خله عند انسان ، ولازم يعرف بسعره

واذا چان الحچي مبذول ، تضيع القصه والعبره

ولا تؤمر قلم بكتاب ، حرام تفرط بحبره

ابو قاسم الملا