حيرني الدهر بحسين

حيرني الدهر بحسين و علية ثقل همه
لا أقدر أعوفنه و لا أقدر أظل يمه
*********
شلون أمشي و أعوف حسين جسمه موسّد الغبرة
و ابحَر الشَمِس عاري و دمه يسيل من نحره
ياهو يغسله خلافي و ياهو ينزله بگبره
و ياهو يوسده بلحده و يشلع سهم اللي بچبده خنصره لچفه يرده
جسمه العلثرى مطشّر ياهو اليظل و يلمه
********
شلون أگدر أظل وياه و هاي النوگ جابوها
يردوني حرم للشام عگب الخِدِر يسبوها
ياهو اللي يباريها لو رادوا يمشّوها
و هية بس جمع نسوان عدهن مابقت وليان بس واحد بقى وجعان
جسمه من المرض بالي و لا بيه عالرچب همة
********
شلون أمشي و يظل عباس مرمي على المسناية
يمه مقطگّعة زنوده و يمه الجود ويا الراية
شگله اللي يگلي وين حامي الظعن و الثاية
أگله على النهر نايم يمه العلم و الصارم مايرضى گمر هاشم
أروح ويا الغُرُب يَسره و يبگى عالنهر جسمه
********
چفلني و جابني وياه و عاهدني يرد وياي
شلون أمشي و يظل عباس مطورح على نهر الماي
ما و الله علية يهون أمشي بيسر ويا عداي
شگله لو يناديني يا زينب ليش عفتيني تمشين و تخليني
و آنة مگطعة چفوفي جسمي مخضّب بدمه
*******
شلون أبگى و أشوف الروس شالوها العدى على رماح
و أسمع للحَرَم حَنة و گبّر لليتامى صياح
ياهو الينزل يرچبه من عدهم طفل لو طاح
و آنة اتچفلت بيهم أرچبهم و أباريهم شلون أبگى و أخليهم
هاي اتصيح يبن أمي ذيچ تصيح يا عمة
**********
شلون أمشي و أخوية حسين عيني تشوف چتاله
و أشوف على الرمح راسه يعاين ذلة أطفاله
و الله تحيّرِت يا ناس بالمظلوم و عياله
لو أگدر أظل وياه و اعوف الحَرَم ويا عداه و لا أگدر على فرگاه
عساني لكربلا لا جيت و أتحير بأبو اليمة