انا العراق

انه الگالو عَلَي بعض الأسمهم ناس
كلت تفاحة ادم ذنبي ما يُغفر
گبل نوح انولد عمري بعدد اعوام
صرت انه السفينه وبيه من ابحر
على متوني رست واليشهد التاريخ
وكت جان البحر ممدود صرت البر
انه المرمي بوسط نار وحطب نمرود
ولكن ما برد حرها وبقت تسعر
انه ابني منذبح لا ما فداه بشاة
على خدوده دمع ومن الدمه معفّر
مثل يونس بلعني وما رحمني الحوت
فرق عنه شجر يقطيني ما اثمر
وگعت ابير يوسف والحيايه هواي
عَلَي مرت ليالي بلون كل الشر
قوافل ما اجت لا صحلي من شراي
انه وبيري شلع معروض وتسعّر
اذا يوسف اخوته بالبخس باعوه
انه برخص التراب انباع وتصدّر
نشد يعگوب عن يوسف عمت عيناه
عَلَي محّد سأل لا واحد اتحسّر
ثبت حگي وقميصي من الدُبر مشگوگ
صرت انه السجين ومرمي بالمنكر
اذا موسى انولد سكته بوسط تابوت
سكن تالي بقصر فرعون وتأمر
انه بتابوتي حبسوني وسكنت لحود
ولا ردوني لُمي ولا رسيت اببر
تهز نخله بحملها مريم العذراء
انه النخله بكثر هزي صرت اصفر
صعد عيسى لسمائه وما بگه مصلوب
وانه بكثر الصلب حتى الجذع خضّر
على خدودي جرن طول الزمن نهرين
سگن حتى الكُبر والما ابد اثمر
يسموني كريم وضيفي فوگ الراس
انه الضيفي طعني بكل كتر خنجر
يجي يوم ويردلي الضايع من حگوگ
عراق اني وعلى العالم انه المنبر

الشاعر ابو قاسم الملا