رسالة من سجن ابو زعبل

عنوان البيت :
ما لهوش عنوان
في الدنيا الواسعة
و ف كل زمان
حتلاقوا كتير
عش وعصافير
تعشق وتطير
فوق الأحزان
عنوان البيت
من غير عنوان

عنوان الشارع :
مصر وبس
من غير أوصاف
وسؤال ودليل
عنوان من فرط الشوق ينحس
من ريحة الأرض
وعرق النيل
سكان الشارع
هما وبس
ولا غيرهم وقت الجد بديل
الراسل : شاعر
عاشق موت
وشيوعي ومصري
بعلو الصوت
عنوان العاشق :
سجن أبو زعبل
وأبو زعبل مصلب للعشاق
عنوان الشاعر : قلب العالم
والعالم عامر بالأشواق
والشعر حصان
رغم القضبان
بيلف العالم كيف يشاء
عزة
الشعر كثير والبحر وفير
والهم جبال والشوق شلال
والعشق حلال وإحنا العشاق
حكاوينا كتير
ح أكتب لك ايه
وأحكي لك ايه

السجن ؟
مافيش في السجن زمن
الوقت ؟
مالوش في السجن تمن
أيام بتمر
وليل بيجر نهار ويعدي
واحنا ف دوامة
والافكار بتجيب وتودي
العالم بره بيعمل إيه
الناس فاكرانا
وساكتين ليه ؟
الناس بتلاقي العيش ازاي ؟
الناس بيروحوا الشغل ازاي ؟
الناس بتمضي اليوم ازاي ؟
الناس بيجيلهم نوم ازاي ؟
الناس الناس
الناس الناس
شغلتنا الناس
والناس ويانا في كل وجود
وإحنا مع الناس
وعشمنا بكره مالهش حدود
وأكتب لك إيه ؟
وأحكي لك ايه
شفتك في الحلم الليلة قمر
وأنا طير كروان
بجناح مكسور
عاشق وحبيبي الليلة أمر
رفرفت خلعت الباب والسور
طيران طيران
طيران عليت
طيران وحدفني الشوق ع البيت
كروان وغلبني الشوق غنيت
حته غنيوة حب قمر
سلامات يا حمام يابو الف جناح
يا معدي الساعة ف غمضة عين
عشاق وبلاد العشق براح
والسكة أمان طول ما إحنا اتنين
محبوبتي قصيدة مع المداح
وانا غاوي غناوي وانا ابن يومين
والبحر عنيها وانا الملاح
يا حمام وعرفنا الشط منين
للغربة ليالي ولينا صباح
ونمد الشمس ع الشطين
رفرف يا حمام بالأف جناح
ودينا لبكرة فى غمضة عين
وصحيت من حلمي لقيتني هنا
بأحلم بيك
وإنتي معايا هنا
ف الحلم هنا
في العلم هنا
ف هزاري ف جدي
وكل ما بدي وباخذ
ويا الزملا هنا
وأكتب لك إيه
وأحكي لك ايه
إحنا تغربنا
وتوهنا كتير
وخلينا العش من العصافير
وتركنا بلاد وسافرنا بلاد
ومشينا تعبنا من المشاوير
عرفونا الناس
وعرفنا الناس
وعاشرنا كتير
وفارقنا كتير
وإتبدل بينا الحال أحوال
وركبنا الصعب من الأهوال
زرعولنا الخوف
على مدد الشوف
وغوونا بشهرة ومهرة ومال
بس احنا بنعشق مش بنتوب
وإن شاء الله ح نعشق
لما نذوب
وإحنا تعلمنا عن العشاق
فوق الأحزان نحلم نشتاق
لو عشنا ف صحرا
في عز الجفرة ونار الصيف
نحلم بالشجرة ولمس الميه ولون الطيف
وان عشنا ف ليل السجن الظلمة والسجان
نحلم بالصبح الحر يشقشق ع القضبان
وان عشنا ف قهر يشق الظهر بسيف القهر
نحلم الثورة
تهد وتبني الدنيا ف مصر

الشاعر
أحمد فؤاد نجم