إعــتذار
ياستى منك
بعتذر
والله جد
أنا بعتذر
فى الحصل
ما لىِ إيد
يا ستى منك بعتذر
*******
وعدتَ واخلفتَ
الميعاد
زودتَ الامك
سهاد
ما قسوة كان
ولا كان عناد
بس كان قدر
حتم على
أصبح بعيد
وتقاسى وحدك
محنتك
وما امد ليك
فى المحنة إيد
*********
ياغالية
منك بعتذر
وأنا كلى خوف
رغم الظروف
فى حالتى
ما بجدى العذر
لو قلت بى كل اللغات
وكتبت بى كل الحروف
ما بوصف الحال العلى
رغم العليك
عاجز أنا بجنبك أقيف
*********
متل المطر
كايس نزول
والصيف يطول
والخريف
فوق الشتاء
لا يوم بجى
ولا منو طيف
يا غالية منك بعتذر
أنا حتى يوم
جانى الخبر
صبحتَ زى
طفلا ودر
يركض يمين
يركض شمال
يبكى ويصيح
كان زول يدله
على الطريق
كان حتى طير
أو كان شجر
والليل يلفه
بازرعه
ضاميه بس
ب وحشته
يشتت قسيمات الفجر
والرعشة والخوف
والخطر
ما شين معاه
شبر شبر
ياستى منك بعتذر
ياريته بس ينفع
ويجدينى العذر
يوم جيتى
زى عصفورة
فى فصل الربيع
بعدالخريف
ومطر دموع
حطيتى رحلك
فى القلب
بين الضلوع
وبنيتى عشك
دون معاد
بددتى ظلمة حزنه
بى شمعة فرح
ضوت شموع
وفردتى جنحيك
فى الفؤاد
تذودى عنه
بكل عناد
وبى عاطفة
تذكيه الوداد
وتذوديه
باحلى ذاد
********
ياستى منك بعتذر
وأنا عارفه
ما كان فى العشم
ولا حتى يوم
كان فى الحلم
أتخلى عنك
فى ثبات
رغم الالم
رغم العنى
الحل بيكِ
وبيكِ فات
يا ستى منك بعتذر
والله جد أنا بعتذر
حتى لو كان بس قدر
والقدر بعمى البصر
إلا بس أنا برضى
منك بعتذر
وبرضى
أسف بعتذر
ومن تانى
أسف بعتذر
لانى ليك يا غالية
ما قادر اصل
ووصالى ليك
يامولى بس
لو كان حصل
والله ما بذيل الحصل
إنه عمق فى القلب
جرحا دفين
واحزان تعيش
فوق السنين
فى قليب حانى و رصين
فياض حنين
أنا ليكى ما قادر اصل
********
كم سعيت
كم جريت
وفشلت
لديارك اصل
ما قيدى دونك
اصله قيد
ماسك الايادى
وفى الرجل
متل الحجل
سجانه قاسى
كتير عنيد
أنا كلما للقيد رخيت
من تانى ليه
يرجع يعيد
********
يا ستى منك بعتذر
كان يوم يفيدنى
الإعتذار
ولا حتى يوم
فى لحظة بس
يمكن بفارقنى
الودار
ما الحسرة
والشوق والالم
بعد الرحيل
صبحن لى ديار
وقلبى من بعد الجدار
الفيه قاطع كل مسار
صبح الاسى
بس هو الإطار
*******
ياستى منك بعتذر
ياريت يفيدنى
ألاعتذار
ما النهار بعد الرحيل
ما عاد نهار
حتى الروبا بعدالرحيل
صبحن غفار
والنسايم للخمايل
ودعت
وبكت
الازاهير
فى الرياض
و البحر غطى الجزر
لمن خلاص
بى حزنه فاض
والغبار عاف الفضاء
ومن وراك
سكن الديار
ياستى منك بعتذر
ومهما يكون
ماا أظنه يوم
يرجع يفيدنى الإعتذار
الخبر مارس 2012 عبد الفتاح جبريل