مو ذاك الاعرفك انت من سنين

اطباعك علية هواي مختلفة

مدغيرة الملامح بيك والاشواك

وجياتك احس مابيها اي لهفة

جنت تجرح كبل يومين عندي يطيب

هسة الجرح منك ابد مايشفة

وجنت توكف كبل والعين تحجي العين

هسة شبيها عينك شو صفت صلفة

كبل حجيك ذهب والناس تمدح بيك

ومن تحجي عسل تتناثر الشفة

هسة اختلف حجيك كلة ذم واعتاب

وبكلمن يودك كمت تتشفة

على جتافي حملتك سرت بيك دروب

وبنار العشك جمدوب اتحفة

مو تدري انة احبك وانت بية الروح

اسهرلك ليالي وعيني ماتغفة

شسولف من ****ك بية صار سنين

ونار البية منك ابد ما تطفة

شمسح من ذنوبك وانت شو كل يوم

تجرح بالكلب وادكلي ما اشفة

طك صبري وخلص والدمع شح العين

وهم البلكلب ماضن بعد يخفة

من عندك نهوني صحبتي واخوان

كالولي صحبتك بالهوى سعفة

وكالولي اتركة ماية خابط طين

لتضن بمحبتك يركد ويصفة

كدامك بحر مكشوف بس من فوك

لو تنذر عمر ماتكدر اتعرفة

كدامك بحر مكشوف بس من فوك

والجوة البحر ماتكدر اتعرفة

عاندت ومشيت وكلت رحلة شوك

حطيت البلم وامواجك تحرفة

حطيت البلم وامواجك تحرفة



شعر اخر عتاب عراقي




خل نتعاتب حطني وحطك آنة لحبك ويكرهونك

غايب عندي مسجلك حاظر حاظر عدهم ويغيبونك

يلوياي أعيونك تبجي وبس وي غيري أضحك اسنونك

تدري أشگد سباني لسانك بگد ما مدحك ويسبونك

أجيت بحرگة وآخذ ثاري ومن لاگيتك گلت أشلونك

ما متغير هاي أطباعي وأنت أتگلي أتغير لونك

لا ما غير حتى أهدومي بس خاف انته مغير أعيونك

من رمل أجفوف الشايلتك بس أتهب ريح أيطيحونك

وجتفتك بمتوني وشلتك وما گدرو مني يذبونك

ومن ينهد حيلي أترد ألهم وصعدهم فوك أمتونك

غايب عني ولا ماناسي وانته اليمهم ميذكرونك

أيذكرونك من تصافح بس أتهد جفهم ينسونك

تدري وياي أشگد مقصر بگد ما منطي وما ينطونك

بگد جف الماسح دمعاتك وگد مسحت جفهم ماعونك

أرضه أترد وشايل راسك وأرضه أترد وأرضه أيردونك

وأرضه أترد مكسور الخاطر بس لترد مكسورة أعيونك