\\\\قصيدة \\احاسيس موت شاعر\\\بقلمي
الجزء الاول \\ وكان الابن يتكلم
000
ها يمه انتي جيتي
انه...ادري الظيم حالج
جيتي تمشين اعله كيفج
والدمع ماخذ جمالج
من نزلتي من عبرتي
...الحزن واضح صفالج
للنجف لمن وصلتي
انشده فكرج او بالج
يمه جدمج انه اعرفه
طيفي ميفارك خيالج
امن الفجر كاعد انطرج
سالي كلبج ماحجالج
انه انزف من اذكرج
بالاخص اذكر دلالج
من تجين انتي اعله كبري
اللحد فز او بجالج
****
يمه بشريني اعله خوتي
هم نسوني نسوه موتي
انه ماخذني سكوتي
هالخذو من عندي قوتي
والله احبهم صدكي يمه
جيبي حسوني ارد اشمه
كليله لا تبجي اعله ابوك
جدك الكرار يمه
من يجيني انه افهمه
بس كون ربي يسلمه
ودري انه هو زلمه
كليله الوالد يريدك
بالنجف ينطر بريدك
بيد اخيك خلي ايدك
حسين ظهرك او عضيدك
ساعة الشده يفيدك
****
جيبي حوراء او تعالي
باجر انطيه دلالي
يمه كولي هي كبرت
امن الخامس هي عبرت
من جنت جانت ذكيه
من اجي تاخذ اديه
بيدي ماشايل هديه
ادكلي بويه اشكد احبك
انطيني بوسه خل اشبكك
ادكلي بويه اشكبر كلبك
ادكلي لايجي يوم او تروح
نبقه بعدك بس ننوح
ادكلي بويه اشعدنه غيرك
احنه احساس ابضميرك
انت عالي يبقه بختك
اتكلي امس بالطيف شفتك
تمسح الدمعه اعله عيني
بالقهر يابويه عفتك
يمه سلميلي عليه
بالطيف اليوم اجيه
****
يمه امسحيه الدمعتج
يمه زرفت حت وجنتج
شو ولا جلمه حجيتي
جثه حسبالك صفيتي
انه مشتاك الحنانج
عسل ينكط من لسانج
انتي منجم للمحنه
نبقه ناخذ كل صبرنه
حتى رب الكون امرنه
حدر رجلج يمه جنه
يمه باجر لاتجيني
يابعد روحي او انيني
00000000
الجزء الثاني\\ الوالده تتكلم
0000
جبت اهمومي او اجيتك
بالحزن يايمه بيتك
بالطيف فزيت او لكيتك
يمه كلي اشلون ابوك
وشلون حيدوري اخوك
يمه جيت اسال عليكم
وموصيه الدفان بيكم
كل يوم لازم يجيكم
000000
يمه اخوتك مانسوك
او مانسو خيك وبوك
اليوم وصوني او يجوك
باجر حسوني يجيك
كل ليله يحجي بيك
وحسين كاتبلك قصيده
مو قديمه\\لا جديده
بالشعر طالع عليك
جنت تكتبله بديك
00000
اي يمه حوراء نجحت
بالخامس اولى طلعت
ماتقبل تاخذ هديه
جتني او باست اديه
يمه سجاد ابنك ماذكرته
بالقهر يايمه عفته
شنهو معقوله او نسيته
امس يبجي لكيته
00000
اصدقائك ما اجوك
بس لا ضايج لكوك
شو ماشفت مشعوله شمعه
امن الكبر طلعتلي دمعه
يمه صوتي هم تسمعه
هسه خليني احجي
انت اسكت خلني ابجي
انه صح جثه صرت
اعلمودك من رحت
يبني كل لحظه اذكرك
من وكت شو خلص عمرك
انت كل عمري او حياتي
ردتك تدفني ابمماتي
00000
اليوم اكضي الليل يمك
يوليدي ابكلبي همك
انت فاهمني او افهمك
باللحد انزل وظمك
يمه ارتاح امن اشمك
يمه تذكر من كلتلك
الدنيه ابدن ماحلتلك
بالفعل رحت امن اديه
هاي حال الدنيه هي