هواي هموم نعسانه......................لاتنده تره اتملّ
يطلبني الحجي المريود..................وآنه من الحجي موشل
ولك دسكت ولك بطّل................... يزّي هموم لتجمّل
جنت ابّور غصني يميل..................وهسّه بعين ومكيّل

اتهجف عرس ليّام............................ما مش صوت ليوصّل
اربي عله الاخو الصّوبين....................ما مش جسر ليوّصل
يادنيه الاخو العينين.....................وفدوه ثنين وكليل
ولا تقبل صفه محبين....................جهد مرادهه اتثّكل
يزحف صاحب التّنخاه..................وعل هوسات متهرول
وابحث لا طوارش ليل..................... ولا صوت بحلم ويجفّل
وادلّي الروح عل نسيان.....................ما تكهب عله تدلّل
ومنشار القهر بالروح......................او وين ايلوحهه يجزّل
اصيح بخيبة الغركان ......................وحتّه جروفهه اتخذّل
ولو زاد التّحبّه كفار.......................وماي رياجنه تبلّل
ولو حتّه النهر عطشان...................او ورك اشجارنه مذبّل
ولو حته الدمع بهتان...................وبسمة شفّه بتوسل
دخل الحزن يدري الغير...................ليش الفرح بتختّل
ولو صبح اليجيك غيوم..................وليلك ليل ويطوّل
خذت مني جثير اخوان...............وفكد الواحدايزلزل
ودفو امّي جمر لشباط..............وجفهه من السّمه مبسمل
بخبز امّي تعوف ايدام................وضوك اثريدهه يرهّل
يا ضوجة هلي العفناج....................ثاري بغربتي اتدلّل
وكل عطر النّشمّه زنوج.....................بس ترابهه مهيّل
هلي يا عطّت المشخاب..................لليشكف تره تنشّل
هلي يا جرّة الجلاّب........................بعز كيوضنه تجحّل
هلي خدر السولف ليل....................وصوت ارعيدهه يجلجل
هلي يا لمّة جوارين.....................وصبّّت جاي وتعلل
هلي فوك السّواجي فياي .............ولو هوميتهه تجلجل
هلي فوك الدّشت تلاّع................ومن تعتاكهه تثيّل
هلي لو لجمت الجدمات..............بس طروشهه تدمّل
وهاي رسومهم هالات................منين التافهه تخيّل
هلي يا نعسة الجادود...............فوك احجارهه اتسبّل
هلي براس الدّرب حبّان.............وللساري ضوه يقندل
هلي يا شهكة الملكات......................لو طال باخو ترحّل
هلي يا مصبح العيدين.................دروح وشوف شتهلل
تفرش ثوبهه الملبوس...................وتلبس ثوب المسمّل
هلي فوك الطّلب وتزود...............وجوّه حكوكهه تنزّل
ولا تغفل على الشّينين...............وعيب سوامهه اتذلل
هلي روش الزّوار كصاص.............ولعب اجهالهه يطفّل
يا جاهل عطرت ادروب...................طب ال هولنه ترعبل
يل حاير تصوغ سلال.......................جف تراب من تجبل
رمّدني الميال هنا........................شوّية طين دنكحل
انهطم صبري عله البيبان..............يمته ارزازهه نقبّل
وتظل انت عراق الخير.....................وبيك الطّيب متاصّل
ويا ريحة سواجي دروب...................يهيه وهيه حتى سيانهه يهيّل