بيمنته سيف المنيه بيسرته كتاب الوصيه
للحرب اسمه انعلن لابس ثياب الچفن
-----------
جاسم برز من خيمته * من بعد توديع امّه
شايل وصيته ومتّجه * گاصد يخاطب عمّه
هاي الوصيه امن الحسن * خطهه ابمدامع همّه
لو شفت عمّك بل حرب * دمك فداء لدمّه
بل غرب لو شفته حاير بل حرب ما عنده ناصر
إنصره بيوم المحن لابس ثياب الچفن
-----------
جاسم لبو اليمه اعتنه * وصاح بحزن يا عمّي
جيتك وجبت اوصيتي * وبگلبي نابض عزمي
ابدافع وصيّة والدي * اوزودي الرضعته امن امي
وآنه ابرباك اترعرعت * وما چنت احسّ ابيُتمي
وانت يا عمي اكفلتني وبحنانك دللتني
وشفتك لعمري وطن لابس ثياب الچفن
-----------
وحسين من شافه همل * دمع الحزن وتحسّر
ضمه اعلى صدره وانتحَب * وصاح اودليله اتفطّر
گبلك فِجَع گلبي الدهر * يبني بمصاب الاكبر
بيا عين اشوفنّك جسد * مرمي ابدماك امعفّر
شلون اشوفنك يجاسم يا شهم عل غبره نايم
اموذر ابسيف الفتن لابس ثياب الچفن
------------
ناداه جاسم يا ثمر * گلب الوديعه الزهره
جمره بفؤادك تستعر * وبروحي نفس الجمره
ابلا ناصر اشلون انظرك * واعليك اعزّ النصره
وشلون الاكبر ينذبح * اولا يجري دمي بكتره
لحربي رايد رخصه منك افتديك وصدري عنك
يشگف سهام الزمن لابس ثياب الچفن
-----------
وحسين ارخصله يهل * عل معركه بِهلاله
اودارت اعيونه اعلى الخيم * لن شاف رمله اگباله
عيناهه تربي اعلى الولد * متلهّفه وتبراله
ومن وصل جاسم حومته * لن صاح بل خيّاله
(ايُّها القومُ اسمعوني إن زعَمتُم تُنكِروني)
(فأنا شِبلُ الحسن) لابس ثياب الچفن
------------
واضطربت اسيوف الحرب * غير الصليل اشتسمع
وامّه تحسّ ابمحنته * وبكل جَرِح تتفجّع
بكل طعنه تصرخ يولدي * بكل طبره تجري المدمع
ولن طاحت ابْوسط الخيم * لمّن وگع بل مصرع
صاحت بلوعة مصابه يبني يل ضحّه ابْشبابه
وبل دمه اشموعه انطفن لابس ثياب الچفن
------------
عقيل الكاظمي / بغداد

(https://aqeelalkadhmi.blogspot.com/)
(https://www.youtube.com/c/amalkadhmi78/featured)
(https://www.instagram.com/p/CaKlDRes...dium=copy_link)
(https://www.facebook.com/aqeelalkadhmi78)
(https://t.me/alshaeraqeelalkadhmi)