#وزن #نصاري

نزف ماي الشمع دم بين ادية
عرفتك طحت باحضان المنية
------------
عگب ما ودعِت للحرب بدرك
علگت شموع سهر اغياب فجرك
أنه وسميت هاي سنين عمرك
وعلى شموعك نزف دمع الرزية
-------------
جره دمعي على سنينك يجسام
لچن مو ماي ينزل غصص وآلام
اوصور عن ذكريات ارباك وايام
اوليالي چانت بنورك مضية
---------------
صرت مره اشوفنك ابحجري
واناغيلك واگضّي اوياك سهري
واذا عيني غفت عايش ابفكري
وصوتك نَبَض دمي اليسري بيّه
-------------
اشوفك شاب واتباهه بجمالك
اوگبل ما أصحه يبني من خيالك
شفتك چنك بساحة قتالك
رموك بسهم مجهول الهوية
-----------------
اوصحّاني ألم ما بين الضلوع
ولا منك أثر لا صوت مسموع
شفت شمعه هوت ما بين الشموع
حسيتك هويت اعلى الوطية
----------------
اوهب ريح القدر والهم والاحزان
طفه شموعي وعِلگ بضلوعي نيران
عرفتك طحت يبني على التربان
وبْدالي اشبگك صدر الحمية
--------------------
بچت عين الحمية بدمع مسفوح
لجل دينك وعمك تحمل جروح
باحضان الشهاده طحت مذبوح
اوغفت عينك على حروف الوصية
---------------
عقيل الكاظمي