ناذر وجودي لعمي * وبإيدي شايل دمي
يل ما تعرفون اسمي * شبل الحسن هذا آني
--------------
ثوب المراجل ثوبه * مثل الحسن بحروبة * وبتضحياته
يتبختر بميدانه * فارس شهم عنوانه * معروفه ذاته
من جدّه حيدر عزمه * والغيره تمشي ابدمه * اتجمّل صفاته
عِقد الوفاء بجيده * وذيچ الوصيه بإيده * اتفسّر ثباته
بليل الحرب طر فجره * ميهمه جيش وكثره
لحسين ناذر عمره * واعلى العهد متفاني
---------------
ثوب الفخر يحلاله * وبصارم استبساله * صار ايتبختر
صاحوا ابنبرة عاجز * منهو الغلام البارز * شبه الغضنفر
شافوا محاسن وجهه * بس البدور تشبهه * وأنواره تزهر
ومن سطوته ومجهوده * بانت ملامح زوده * من نسل حيدر
منّ الحسن شخصيته * امن حسين اصل تربيته
من گمر هاشم صيته * بل موقف الميداني
---------------
لاح المهند بيده * ولن يصدح بتغريده * هذا آنه جاسم
إن كنتم تنكروني * بهل معركه تعرفوني * شبل الضياغم
نجل الحسن عنواني * وحسين اهو الرباني * ليث الملاحم
واليوم شفته بحيره * وناداني صوت الغيره * وعل حرب عازم
والوالده تشجعني * وبدموعهه تودعني
واعلى الحرب تدفعني * وتحشم بوجداني
--------------
أقسم بدمعة أمي * هل يوم احقق حلمي * بعرس الشهاده
أنصر عزيز الزهره * ونحري يسابگ نحره * بساحة جهاده
عن عمي ما أتخلّه * والتضحيه من أجله * أعظم عباده
اويتعاله بل حگ صوتي * وتصير لحظة موتي * لحظة ولاده
راجل برز للعسكر * بركان غيظه اتفجّر
عينه اعلى جسم الأكبر * ويدوّر اعلى الجاني
----------------
سلّط عليهم سيفه * منهم أخذ كل حيفه * وللجيش شلّه
حيّرهم ابصولاته * چن حيدر بحملاته * بل طف تجلّه
ومن گرّبت آجاله * وبيه حاطت الخيّاله * وصرخاته تعله
گلب الحسين اتگطّع * وصاح الألم لا ترجع * من گلب رمله
لا لا ترد يا عمري * ياللي اطلعت من صدري
مأموره آني بصبري* بهاي الحسن وصّاني
----------------
ذوب بمواقف طفّك * خلّي بدماءك چفّك * يصبح خضابه
وكل جيل منك يفهم * تضحيتك وفيض الدم * يفهم خطابه
وآنه يشمعة بيتي * أتفاخر بتضحيتي * وجرحي وعذابه
وثمرة جهودي وتعبي * ابمولد الحشد الشعبي * وغيرة شبابه
وكل أم تشوف افعالي * تضحي بإبنهه الغالي
حالتهه تشبه حالي * ومنهه الگلب واساني
--------------
عقيل الكاظمي / بغداد

(https://aqeelalkadhmi.blogspot.com/)
(https://www.youtube.com/c/amalkadhmi78/featured)
(https://www.instagram.com/p/CaKlDRes...dium=copy_link)
https://www.facebook.com/aqeelalkadhmi78) (https://t.me/alshaeraqeelalkadhmi)