ذمــــة
ــــــــــــ
الله يرحم أبويـــــه ، تلث مرات راح لمكة ، وكل ماينــــوي يروح للحــج لو للعمـــــرة ندخل إنذار وياه لأن كل ساعــــة شاحطنه وماخذنـه لناس نعرفهم ومانعرفهم حتى يبروه الذمـــة ..
لما نسأله يابه شدعوه عليك هيــچ ؟ يگول ميخالف ، الواحد مــن يروح لبيت الله ومسجد نبيه لازم ماكو واحد يطلبه شي ، ومن يروح لهيــــچ أماكن مقدسة لازم ماكو واحد زعـــلان عليه ، ولازم ما يكون ماكل حق أحد ، ولا ظالمه ، ولا غاثـه بحچاية ، ولاماخذ غيبته ، حتــى من يـروح يناجي ربه ويطلب منه حاجته يروح ونفسه مطمئنــــة إنه ماخـله وراه ناس يسبون بيه لو فاتحين زياگهم ويدعـون عليه ..
آني هسه صافـن على ذولي النـواب القنــــادر إللي راحوا مشـــي لزيارة الحسيــن وعافوا وراهم ســـت ملايين موظف فاتحين زياگهم ويدعون عليهم بسبـــب تأجيلهم النظـــــر بقانون الاقتراض اللي دزته الحكــومة لمجلس النواب لما بعد زيارة الاربعيـــن واللي إتسبــــب بتاخير رواتبهم لمـدة تقارب الشهرين ..
زين ذولي النواب شراح يگولون للحسيــــن من يزوروه ؟ وذولي النواب الحرامية يدرون انه هســــــه الموظف ماخلالــهم أم وأخـــت الا وگعــد يقسملهه عالكتلوك لو مايــــدرون ؟
اللهـــم إني صائم ..