للكوفه مسلم سار ** وبيمنته البتار
بموقف شرف ** واشرف هدف
بيه تقتدي الثوار ** وبيمنته البتار
------------
فكرة هدف حسّاس * بسيف اعتقاده * لهل فكره يرسمهه
مسلم رسم للناس * صورة جهاده * وبالكوفه قدّمهه
هالصوره رفعة راس * ابدم الشهاده * طرّز معالِمهه
بحكمه وعزيمه وباس * وهمّه وإراده * للصوره جسّمهه
بيهه الهدف مدروس ** وبالواقع الملموس
من جسّده ** مسلم بِده
بتوضيحه للأفكار ** وبيمنته البتار
------------
أصبح سفير حسين * وهاي السفاره * تريد اليكفّيهه
جاهَد لأجل الدين * وبكل جداره * من حصّل اعليهه
مثّل ابو الحسنين * بذيج الوزاره * حين التزم بيهه
وَي سيّد الكونين * وبإقتداره * لهالرتبه يوفيهه
ومسلم بِذَل مجهود ** بهل موقف المشهود
موقف عَدِل ** طبق الاصل
من موقف الكرار ** وبيمنته البتار
--------------
للهادي حيدر چان * صارمه وسهمه * وعونه اعلى عدوانه
فارس بكل ميدان * ولجل ابن عمّه * ايضحيله وجدانه
ومسلم بهل وجدان * لجل ابو اليمه * وبروحه يتفانه
شاهر بكل إيمان * سيفه اعلى خصمه * والغيره عنوانه
الكوفه دخلهه وراد ** همة علي تنعاد
وبيه الامل ** لمن دخل
ويحفّزه الاصرار ** وبيمنته البتار
----------------
غيرة علي بِدماه * وبكل بساله * وَثْبة أسد واثب
اتقدمت * تتلگاه * أهل الضلاله * وبنظرته ايراقب
بس الگلوب اوياه * سيوف الجهاله * ضد مبدأه تحارب
سل صارمه ابيمناه * بساحة نظاله * وبناظره الثاقب
شاف الشهاده تريد ** بالتضحيه التخليد
وما تحرِفه ** عن موقفه
شما كثرت الأشرار ** وبيمنته البتار
---------------
مسلم بهذا الحال * بالمحن وحده * وجيش العده اگباله
بعزم اليِهِدّ اجبال * صارمه ابيدّه * يا هو ايتدنّاله
شد عالجموع وشال * حومته بجهده * والحومه تحلاله
موعد مع الآجال * هالليله عنده * ويتنطّر آجالـه
يهجم على العدوان ** ويشتّت الفرسان
لاچن صدر ** حكم القدر
واستقبل الأقدار ** وبيمنته البتار
---------------
ظل وحده بين الگوم * دمعه ايتجاره * وصاروا ينشدونه
ليش الدمع مسجوم * المثلك خساره * تتهامل اعيونه
ناده بگلب مهضوم * ملتهبه نـاره * وطاح وفگد عونه
ابچي على المظلوم * ايفارگ دياره * والبايعه ايخونه
ودّع حياته بعين ** تتجاره لجل حسين
بگلبه استقر ** معنى الفخر
وبيسرته الإيثار ** وبيمنته البتار
----------------
عقيل الكاظمي / الشارقة