*★أمنيات رمله★*
✿✿✿✿✿
ياجمال الله العله أعيونك لـگيته
ياحبيب أمك ﮔلبهــــه أمك سبيته
بالمبارك يجاسم ** يعريس الهواشم ** أحله چلمات
✿✿✿✿✿
فرحـــه وعيوني ترف ** أمحوطه أبسبعين ألف يبست الحنـه يجــاسم فـــوﮒ أديــه
الوحده أيسيل الدمـــع ** يطفه بهداي الشمــع ** العبره تخنـﮓ ضحكتي بأحله مسيه
فدوه أروح الضحكتك ** أبعلي يبنـــي أمعــوذتك ** ياحلاة أعيـونك أيبسّمــن أليــه
يبنــي ياتعب الصبـه ** يا سهــر لــيـل وربـــه ** ياجمــــال ونــازل إمن الله هديـــــه
عطـــر خدك شليه أبريحـة الياس ** وشني أبيوسف جماله أمعجبه الناس
حِسن ربك حلالك ** يحفظه الله جمالك ** أحله چلمات
✿✿✿✿✿
يا كحـل هاذه الجفـــن ** يبنـي ياأجمـل غصــــن * علـگت روحي أعله وجناته الأماني
يا دللــــول المــــهـــد ** هيبــــة أمـــك والضمـد ** ياجمـال الله العله أعيونك سبانـي
حته چلمــات الغــزل ** مــاتت أبطــولك خجـل * ياحبيب أمك يشـــوﮒ الماله ثانــي
باﭼــر أبطلعــة شمس ** دمعــه لو زفـة عـــرس ** لو يجيبــون الشمــع يبني أبصواني
أهلهـلك يجاســم وذب شــوباش ويهوسولك عمــامك والفـــرح طاش
گمرهاشم يزفك ** يهوس بيده عمك ** أحله چلمات
✿✿✿✿✿
ويــه روحــــي منسبل ** أعيـــوني منك ماتمـــل ** أشلون أملنه الهوه البهداي أشمه
يا مـــــلاك ومبتســـــم ** ضحكتــك أجمــــل حلم ** يا ألذ چلمـــة حبيبــــي وأحله يمـه
أعيوني بيك أمهيمـــه ** كل صبــــاح أمعلمــــه ** وياصباح الله أبشفاهك أحله بسمـه
عمــــري ياجاســم ذبل ** أنته لعيــــــوني الأمـل ** جرحي المهّــود حبيبي لا تلـچمـــه
يسباح الدليل أمهوده الآجــروح ** أخذ نبضة دليلـــي كونـك أتــــروح
أيشيظل يمه أبحياتي ** يموتن ذكرياتي ** أحله چلمات
✿✿✿✿✿
يلـي نايــــم عالتـــرب ** أبدم وريـدك منخضـب ** عــافيات أبنومتـك يبنــي تهنـــه
هــــايه زينب عمّـــتـك ** أتشد ضعنهــه رادتك ** تالي چفهه وچفـــي من دمك تحنه
عـــمتـك أربـــات الخدر ** ترضه تمشــي لليسـر ** يحدي عـماتـك زجـر ويسب حرمنه
ظهــري يوليـدي أنحنه ** چنــي فـــارﮔـتك سنـه ** ياحبيب أمــك يمـــن كلك محنـــــه
يغالي أجعودك أمخضبتهه الأدموم ** ييمه أشغيــراهه أبسـاع الإرسـوم
يجاسم فدوه لسمك ** فلا تنساهن أمك ** أحله چلمات
✿✿✿✿✿
ألمـن أگليبـــــــي يدﮒ ** أمغيره أرسومك صدﮒ ** إﮔـعد وحاچينـي بعد أرسومي كلهه
لاعليـــــك أبدمعتــــــي ** يُمـه تحمـــل فرگتــي ** شلهه أمك بالعمـــر لو راح أملهــه
اليله أشدن معصبــي ** وباﭼـر أبضن السبــي ** سكنه أعصبهه ألبـﮕـه أبعمرﭺ أگلهه
ترضه تسبيهــه الزلـم ** حوفـتـك وانته الشهــم ** چف سكينـه إمن الحبل ياهـو يحله
أنسه ضحكاتك صدﮒ ونسه المحاﭼـي ** لا عسه عيوني تطفيهه البواﭼـــي
وعوفن أحله چلمه ** حبيبي الغالي يمه ** أحله چلمات
✿✿✿✿✿
أمهنـــه يالنومـك حلـه ** أشلون أديــك أمـــسبله ** وينه جـرح الضاهدك خلينـي أشله
نندفــــن يمـه ســــــوه ** يبني ياشمــــة هــــــوه ** مـــن أضمك بين أديه الموت يحله
باﭼــــر أبوليه غــرب ** حرمه وعيونــي تـصب ** للسبـي ضعن الفواطم يحدي رحله
ويحدي بالناﮔـــه النذل ** أبـچفــــي لوشــد الحبـل ** يمه وبسوطه العدو متنــــي يهدله
باچر أبوليــه زلم أمشــي أسيـــــره ** لا أهــل بالطف أليه أولا عشيـــــــره
غريبه ودهرذبني ** يظل ذكراهه يبني ** أحله ﭼلمات
✿✿✿✿✿