مشاي على وعدك
صليت لو بعدك
لحسين شنو ردك
أجب أجب

گاصد على حسين بدمع زكيها العيون
لاتنظر ابنظرة بشر بالغير مفتون
لو أذن آذان اعتني ويه اليصلون
عنك حسيني ملتزم خلهم يگولون

آداب تدريها
وصاك علي بيها
خليك على عهدك أجب أجب
____________________________________

حسين ايريدك من اتزوره ايشوف ابوجهك مصيبه
تجري ادموعك لجل الجثة الظلت بالطف سليبه
عوف الغيبة وسامح وأعفي ونفسك عنك رقيبه
سفرة الربك هاي السفرة مو بس گاصد حبيبه

تحتاط من كلشي
وياك نبي يمشي
لحسين مو وحدك أجب أجب
____________________________________

انظر عليهن للمشن خواتك
وامك وياهن بالمشي وبناتك
والزهره تمشي وتندعي النجاتك
زينب عليه اتصيحلك جزاتك

لحسين خطواتك
غفران زلاتك
إن كان هو قصدك أجب أجب
____________________________________

بالمروة تمشي والصفه بين الإمامين
بالكعبه طايف لو طفت عباس وحسين
حته الهوه أحرم يحج يم اعظم اثنين
لو زعلتهم ياتره غفرانك امنين

لتعوف قرآنك
واتطيع شيطانك
ويضيع كل مجدك أجب أجب
____________________________________

كل خطواتك خطوة ابخطوة حسين ايردلك فضلها
من تمشيله ايرد يمشيلك يوم المحشر مثلها
حسين الصوره الما يرسمها دمعه ايضيع شكلها
قربان الطف واسماعيله وبيته الجامع شملها

لحسين دمعاتك
ترتيل آياتك
لو ماي على خدك أجب أجب
____________________________________

يلتمشي لجل حسين اخذ صفاته
رغم الحرب بس ماترك صلاته
اخذ الحياتك عبرة من حياته
وانسه الهوه لا تنسه ذكرياته

من مات من اجلك
مفروض يوصلك
شنو راد من عندك أجب

____________________________________

كلمات الشاعر ناظم الحاشي

كتابة/ Zahraa Al obaidi