كنت زمان الجأ للكتابة من اريد اعبر عن شي بداخلي . كان عندي واهس اكتب واعبر واشخبط مرات مثل الانسان الواعي المثقف ومرات مثل الطفل.
كانت بعض الامور بوقتها تزعجني او احس انها ضغط عليه بحكم اني اتحملت المسؤولية بوقت كان باقي الشباب يادوب مقررين يبدون يعيشون حياتهم ويستمتعون بيها، فكنت اي وقت فراغ يصادفني اكعد اكتب سطر سطرين ثلاثة واروح وارجع بعدين اكمل، وبعد فترة تلكاني كتبت جريدة بيها احداث ومواقف تصادفني او مشاعر احس بيها او او او ...
مرت الايام واني يومية اكول يلة باجر احسن وافضل .. وبعد ما مرت سنوات لكيت نفسي راجع 200 خطوة ليورة والضغط النفسي الي جنت احس بيه مرات صار مرض مزمن مرافكني مثل ظلي .. وتركت كل شي جنت متعلم عليه واحبه ومنها الكتابة .. وبديت اعيش عزلة مخيفة ولدت داخلي كآبة وصراعات نفسية خلتني اخسر حتى نفسي الي جانت بيوم من الايام نكدر نكول عنها حلوة.
وقبل 3 ايام فتحت الايميل لكيت رسالة من درر العراق بيها تهنئة بعيد ميلادي 1/7 وقريت الرسالة وسالت نفسي .. هاي شنو هم اكو بعد منتديات وناس تدخل وتكتب وتشارك ؟؟!! معقولة ؟؟
فتحت المنتدى لكيت لا والله اكو حياة وناس تكتب وتعبر وتشارك ..
رجعتني هاي اللحظات لسنوات تجاوزت الـ 13 سنة ايام ما جنت اهرب من ضغط الحياة وادخل احد المنتديات حينها واكتب واشارك واعبر ..
شكرا درر العراق اولا على تهنئة عيد ميلادي .. وشكرا للاعضاء الوفيين الي بعدهم من سنين متواجدين بهالمنتدى الراقي ..
اتمنى ان تتحملوني وان يكتب الله النا الاستمرار اكثر واكثر ..
سامحوني على بعض ما خطته ازرار الكيبورد من ما بداخلي ..
لكم كل الود ..