قصة حلوة اقروهه !!
اكو رجل اسمه ابو محسن الله إمگدره وخيره چثير

راح للگصاب گاله وزن لي خمس كيلوات لحم
بين ما الگصاب يوزن اللحم
اجت أمرأه چبيره بالعمر مدت ايدها بجيبها طلعت فلوس امطبگه
گالتله جده وزن لي على گد فليساتي ....
گالها زايره فلوسچ ما بيهن لحم راح انطيچ ابمچانهن كيلو عظام
گالتله مايخالف نعمه من الله
ابو محسن واگف ايعاين على المرأه
گالها : زايره تدرين انه هذا اللحم اخذه لچلاب عندي يحرسن الحلال
انتي ماخذه عظام المن ؟
گالتله جده اهم شي القناعه انه عندي عيال ترضى بالقاسمه الله
ابو محسن صاح على الگصاب گاله انطي الزايره اربع كيلوات لحم على حسابي
ردت الزايره مشكور جده عيالي ما ياكلون لحم چلاب!
ولأنها امرأة معدله وعندها ايمان بالله وحامدته وشاكرته على النعمه عرفت إشلون إتحط الچلمه إبمچانها

رباط سالفتي اكو وادم ترى تتغدى ما تتعشى لا تقصرون وياهم وجايكم رمضان المبارك تراحموا ترحموا والفقير ما يحس بوجعه غير رب العالمين. ..

اذا جارك ، اخوك ، گرايبك تشوفه محتاج ساعده ترى مايضيع عند الله شي بس بدون ماتجرحه بكلمه تحسسه بفضلك عليه ترى الكلمه اقوى من الرصاصه على قلبه. وتحياتي#ا