المشاركة الأصلية كتبت بواسطة فواطم الصافي

إلهي .. أول شي أحبك
المهم
البارحه آني جنت أشوف فلم وثائقي عن الأورغواي على قناة آر تي الروسيه ..
و من خلص طلعو أعلان عن فلم وثائقي ثاني عن الكونكو
بالأعلان طلع رجال بشرة وجهه سمره حيل
تعرف النظره الي شفتهه بعيونه ..
ما شفت هيج نظرة يأس ..
أبد ..
نظرة عيونه تبجي ..
جان يحجي
يكول عدنه أسطوره تكول أن الرب جان شايل بأيده سله و جان حاط بيهه هدايا وبده يوزع عالعرب و أنطاهم هواي أشايء ومن وصل ألنه جان تعبان و شمرلنه كل الي بالسله
أنته تفهم عليه يا إلهي .. من البارحه لليوم آني أفكر
و حته بالباص اليوم الصبح آني مو أتأمل بكل شي و أشوف عظمتك بي بس اليوم جنت أفكر بهذاك الرجال
يعني يا إلهي أنته عندك رحمه ما أهلهه حدود و بدون شك أنته أرحم مني .. بس هو خطيه .. ساعدهم شويه
أترجاك ..
يعني معقوله هذوله بعدين يروحون للنار .. خطيه والله .. يعني ما شايفين شي من الدنيه غير التعب
بعد عباره مستحيل تروح من بالي .. عبارة ( الرب غادرنا منذ زمن ) هاي أكو واحد هنا بالمنتدى أسمه هانتر بالأنكليزي هسه هو دكتور و من زمان راح لفد بلد أفريقي و واحد من الناس كله "الرب غادرنا منذ زمن"
خطيه يا إلهي ..
يعني آني عقلي مستحيل يتقبل فكرة أن هذوله راح يروحون للنار
خطيه .. فوتهم للجنه بأي طريقه .. حتلو تفوتهم على شكل خدم بالجنه و حته أذا ما قبلت تفوتهم و أبد مستحيل يفوتون آني أذا رحت للجنه أقبل توديني للنار بين فتره وفتره حته آخذ العقوبه مالتهم وفوتهم للجنه
آني أحبك يا إلهي .. أعشقك عشق مُستميت
شكراً ألك من ركن وريدي التاجي ..
أحبك يا ألهي
أحبك من كل كلبي