تستاهل واتمنالك اني الخير
تستاهل واتمنالك اني الخير
صح فرصه مثلها من الصعب تلكَه

حط أذنك على صدري . . سمعت الصوت
تسمع فرح كَلبي . . تسمع الصفكَه

بقه عندي فرح زايد حرام يضيع
مر أخذه بطريقك ساعه الفركَه

بي تلكَه ابتسامه تلكَه ضحكه بصوت
انته ادخل بروحي بكيفك استنكَه

انه هسه فرح بالروح ما محتاج
ما يحتاج فرحه ألينوخذ حكَه

ولو راح الشماته أبـعدك يفرحون
وتفر الوجوه الجانت مدنكَه

ولو راح أذبل وألكَاك نسمه موت
تاخذ بالخريف من الغصن وركَه

بعد حته من اغني جفوف اليسمعون
تهتز هزه أيد الما ألك خلكَه

من ايدي الخاليه راح تعرفني الناس
أمبين عليه وي الحزن رفكَه

دليني الهوى من تروح وين الكَاه
بدونك نفسي ضيكَ والأرض خنكَه

كَالولي أخذ طوق النجاة وياك
موج الشوكَ عالي أليتعب يغركَه

وأبد ما فكرت يمته اوصل أعله الراكَـ
بس شكَد حلمت بروجة الملكَه

اجيتك مطمأن جيت شراره ألـ ماي
يفتك باب شكي ولهفتي أطبكَه

عله لحظه وشفت نظره عيونك ثار
وشفت الورده بيدك تنكَلب تفكَه

وكَع منك وجه بس انته عندك خير
ألي يدور بوجهك جم وجه يلكَه

ردتك تكَعد تصفي الضنون وياي
يا ضن النعوفه وياهو ألنشكَه

وأشطب يا حلم . . خل نفرض وجزيت
من راحات اديه شيمسح الشبكَه

رجعت اضحك عله اسنين الكَضن وياك
وعيون الشماته بفرحتي مصدكَه

شافوا ماي بيدي توقعوني أزكَيك
ما يدرون أطفي بشجره محتركَه

تستاهل واتمنالك اني الخير
صح فرصه مثلها من الصعب تلكَه