..بالحلم شفتك ماي وشگد عطشان
جودك نضح رمان بس مالوحه
خلّيلي طيفك خاطر اتغزّل بيك
يل گلبي صار ابغيبتك مرجوحة
ليلك جدايل عل الخصر ملفوفات
وجهك سمار البيه كله ملوحة
طولك غصن يتمايل بهبة ريح
نضراتي بيك بكل وگت مفضوحة
خيط الفجر ينطر بثغرك واشتاگ
واهتز مثل واحد يتيّه روحه
ناوشني چفك چرغدت بيه ايتام
وعيوني لچفوفك دهر مشبوحة
شفاف تتلبس بروحي وماشوف
همسك نـِمه الـ گلبي ويروف جروحه
فيّ شجرتك يوميه اشوفه ومختاض
حتى البلابل عل الغصن مذبوحة
خليت بيه جروح ماتبره بيوم
والدمعة ماهادت تضل مسفوحة
بعدك طفل محتاج ضحكه اتجاريك
مو وكتك اوتستعجل عل اللوحة

ضياء الصافي..
[/QUOTE]