يل ماخذ وياك الروح...عفت شكثر بيّه جروح

يل عفتني و ما شفتني شلون بعدَك

گلبي ينعى وصرت اسمعه يشكي بُعدَك

¤¤¤¤¤¤¤¤

روحي وي روحك سوى..تقاسِمَن حـتى الهـوا

و حتى بجُروحَك

ما تصير و لا تصح...مِثل شمس ويه الصبح

روحي ويه روحك

ما تمر عالبال چانت يا حياتي
نفترگ و تموت وياك امـنياتي
ذكرياتك تندفن وي ذكرياتي
بالگلب يل ذاتك المفگودة ذاتي

فرّگنا يلغالي الموت...و روحي اصبحت لك تابوت

بيها اشيعك ما اودعك كُلّي عندَك

گلبي ينعى وصرت اسمعه يشكي بُعدَك

¤¤¤¤¤¤¤¤

تدري عني من رحت...مو من فراگك صِحت

يا نبضة بيّة

ردت اذكرك فد امُر...احنا مو گِلنا العمُر

نگضيه سويّة

شلون عني تهاجر و تتركني ولهى
روحي من بعدك يتيمة ياهو إلها
لمّن اتفگدك و تسأل شَرْد اگلها
و انت مو منها جزء لا انتَ كِلها

من تسأل تريد اجواب...و تنطر تظل دگة باب

بيش اصبُّر روحي و اصبُر نار فَگدَك

گلبي ينعى وصرت اسمعه يشكي بُعدَك

¤¤¤¤¤¤¤¤

من رحت راح الأمل...و ريت ياخذني الأجل

يا بو المحنـّة

روحي عذّبها الحزن...و اگضي هالليل اليجِن

ونّة اعلة ونّة

عيني كل لحظة التمُر يسأل دمعها
عنك و صورِتَك بيها الحُب طُبَـعها
صار من بعدك الترافة الهَم طبعها
گابلت مفجوعتَك جارت شمعها

دمعاتي تسأل وتطيح..وبروحي احس بيها تصيح

كافي هَجرك عوفه گبرك طـرّه لحدَك

گلبي ينعى وصرت اسمعه يشكي بُعدَك
#مرتضى_الشمري