سولف الماي بحزن رايد چفوف
جاوبة العباس
من طبك عطش .(عدم اهتمام)

(الماء يستدرك)
انا كالو عني سر هاي الحياة ؟

(ابا الفضل بثقة صادقة)
انا ذاك العل كناطر دم نقش .

(الماء يتوسل)
فدوة وصلّني اللهاتك ارد اعيش ؟

(ابا الفضل ينتفض)
هسة مافارغ ألك بالروس اطش .

(الماء يتلعثم)
الكاع حستني ثكل كل حملي طين
وشيعتني شلون تشييع النعش ؟

(ابا الفضل بحكمة)
اسكت اسكت لا احط جربة بكفاك
من عملتك بير زمزم مندهش

(الماء بتوسل)
يابو فاضل خاطر اختك !!!!

(ابا الفضل بغضب)
شنهو عيد ؟؟؟
خاف تصّور بو فاضل كلبة هش…… ..
زينب يمرها العطش عابر سبيل
ومن تضامنها ويخوها تكلة دش .

(الماء يفقد الأمل)
أي لجن خلني علة بالك انا ماي !!!

(ابا الفضل غضب شديد)
لا ؟؟؟ خفت من حجيك وجسمي ارتعش ؟

لاتهددني بعطش وحسيني ماي
راوي من عندة نبي و ( ۱۳ )

معصوم،مامعصوم انّة العباس اصير
من اديرن جربتي تعادل بحر

انا مكفاي انخلق بس للدخيل
انا رب الملكى ماانطي الظهر )))#

انا شفت الموت كتلة ادنة، مات
صحت كوم وكام بس بسرعة فر

انا كعدة سيف حك من احجي روس
ركاب تهدل والشرد كول انتحر

بيها كالوا كربلة عطشانة حيل
توني اريد اخزر الغيم وزخ مطر

(ابا الفضل يستدرك قليلاً)
بلّة اوكف يانهر صوت اختي هاذ
ها يزينب شنهو ردتي امن الكمر ؟

(زينب بتعجب)
خوية شفت النهر يمك شنهو راد
چنة خايف ، خاف عطشان النهر .

(ابا الفضل يسأل الماء )
تأكدت لو بعدك تريد الحُسين ؟

(الماء بخوف شديد )
لا بوفاضل انا دارك هالامر !
اعتذر جنت انا احس بروحي طير
وهية بس چفينك الترهملي عش
انا بالع ريج فشلة مستحاي
من اهد ماكتلي من طبك عطش.