هـذا چَـف رَسولَ الله..على نَحرَك يـَ عَبدَالله
ابدَمّـه تخضَّب و صَلّى..على نَحرَك يـَ عَبدَالله


مِـثِل طيرِ الـ يرَفْرِف لو وِگع مذبوح

عبدالله اعله چفّ حسين ابوهِ ايـلوح

نِزَل چفِّ الأجَل منّه استَردِّ الروح

و يعينَ الله الـ يشاهِد طفله دمّه يفوح

نادى بحَسْرِتَه و نَوْحَه..لمّن عرِّجَت روحه

حِزَن گلبي و حِزَن گـبْـله..على نَحرَك رسول َالله


يَبْني تشوف بعدَك لو غمَضْ جِفنك

هذا المصطفى جدّي اجه ايدِفْنك

كل گطرة دِما يبْني جِرَت منّك

خضب چفها بيها گبل ميحضنك

راد الـ صَدْرَهِ ايضُمَّك..تمازج دمعه وي دمّك

دمعه لا تظن يِغلَى.. على نَحرَك رسول َالله


نزَل بدموعه جدّي يواسي دمْعِ ابنه

و من دم منحرك يبْني تـِخَضّبنا

و بنبْلة حِزن فقْدك تصوّبنا

و مأتَم بالدمع لمصابَك انصَبْنا

منّك يا ذنِب بادِر..ذبحوك بسَهم غادِر

و ذبحوا موقفه و فضله.. على نَحرَك رسول َالله


ما بيناتنا بالحسرة وسَّدناك

و كِسَر صبر العِيون الدمع من شفناك

ذكرنا امصيبة أمنا و كل شي صار هناك

و اتجسَّد اخوي المحسن ابمَعْناك

من كِسروا ضلِعها أمّي..المحسن هَم وِگع مدمي

فِكره لصورِته اتوَصْله.. على نَحرَك رسول َالله


انت بحضِن جدّي و دمعي بحضاني

واحد بالدِّموع يواسي للثاني

بأحزانه الرسول يواسي احزاني

واسيته اببضِعْته و بيك واساني

من كِثْرِ الحزِن و الهَم..صار الهَم جَمُر بالدم

الگلب من عِنده يِتصَلّى.. على نَحرَك رسول َالله


بحَسرات الگلب و بحرگة انفاسي

و سّدتك بگبرك و الحزن قاسي

الك مو راسي شيَّب گلبي و احساسي

لأن يوليدي بَعدَك ينگطِع راسي

وداعاً يا بَعَد روحي..يشَيْعَك دمعي و جروحي

شيصبْره الگلب بـَلـّه.. على نَحرَك رسول َالله

#مرتضى_الشمري