يا ابا عبدالله يا حسين:

نِـزَل دَمعي و رسَم بخدودي مأساتك
و احِس روحي تعيش اصعَب معاناتك

يَـ مِسْرِج عالمَنايا و لا هِـبـِت موتَك

صِحِت هيهات للذِلّة و خـِلَـد صوتَـك

جَلال الله الچـِفَن و الجـنّـة تابوتَـك

يـَل جَسَّدِت بَعْضَ اوصافَهِ ابذاتـَـك


رِحِت ما راح ذِكـْرَك بس خَصيمَك راح

و مـِثـِل دينَ الله حُـبَّك صار بالأرواح

يا أوَّل نَـحَـر يضـْحـَك عَلى الذبّـاح

و نِزَف دَمّ الكَرامـة بنَزِف طَعناتك


انتِصر عالسيف دمَّك يا گطيع الراس

و الجبّار خَصْمَه الفـوگ صَدرَك داس

يـا قُـرآن نـاطـِق انـزَلـَك للـنـاس

و على تراب الطفوف انداست آياتك



بأخير انفاس طايِح جثّة مَدميّـة

و حِمَل جِسمك جِراح الف و تِسِع ميّة

و نِداءَ الله (إرْجِعِي يا نَفِس مرضيّة)

الله الـ قُبَض روحَك ذيـچ لحظاتك


ظَل جِسمك الدامي و راسَك المَنحور

و روحَك عَرّجَت لله بجَلال و نور

تستَقْبِلها بالنَّفحات كُِل الحــــور

عند الله عظيمة شگد مقاماتك


اعيش آلام عاشورك يـَ بو الأكبر

و صَبْر ايّوب احتاجلها بَل اكثر

كُل طَعنة برُمِـح لو نَبلة بالمنحر

احِس بيها و اعيش بذيچ آهـاتك


وِگفْت بـيـا عَزِم من راحوا الأنصار

كل واحِد جرح بالروح يلهَب نار

يعينِ الباري گلبك حِمَل كل الصار

عِشت بِنْهار عاشِر اصْعَب اوقاتَك


الله يساعدك من ودَّعك جسّام

و لمّن راح الأكبر للحرب عازم

شِفِت كُل منهُم بحِجْر الأجَل نايم

و مزَجْت بدَم نَحَـرْهُـم جاري دمعاتَك


وِگفْت بيا صَبُر يحسين و بيا باس

و تِملّـك روحَك بساعتها يا إحساس

بِچـى كل شي اعله حالك من مِشى العباس

ذيچ اللحظة اصْعب كل مُصيباتَك

#مرتضى_الشمري