على ضيمي تحسديني يا دنياي
شوفي الدمع ملاها العيون
وصبرّت الصبْر وشلونج بهاي
حته الصْبر ودعني وكتله ممنون
انا ما همني لو تشل يمناي
بس همني ليش يسراي اتخون.
لان يمنتي تشربني الماي

ويسرتي تروّه ومفتحْه العيون
وبيوم الطاحت اليمنى بجوّرعداي
يسرتي تبرت وهنه بفــّرد لون
هيج انه من غيمت دنياي
صفيت وحيد ابين اليونون
وصديقي عيني بعيونه وتنزف دماي
ماهمه ومشه خلاني مطعون...

بسك تصيح العين ما ينفع ابجاي
خلصت دموعي عل ما يوافون
مشكلتي للي اعاشره بالنبض شراي
وارهن له عمري ويه اليرهنون
من انه صغير وجروحي وياي
ارضعها دمع وبيه يكبرون
حته ضحك الجذب ما شافته شفاي
ولاشفت ضمد من اليضمدون
الفرح يكلي ودعتك لو صرت ادواي
ما امر على بابك مثل اليفرحون
وارد ببتسامه والضحك بلواي
شيفيد الفرح لكليبه مسحون
راضي بقدري شكد حلو مثواي
وارضى بدمعتي اكون مسجون

مرات الدمع بيه راحه يا دنياي
وانه ارتاح كلش لمن ينزلون
ازف تابوت كلبي والجسم حاي
وجروحه تهلهل هنه ويزفون
انه ما ظل مكان الي بحشاي
ما شاف العذاب يلي تنشدوّن
عشت نهر الوفى ويصب مجراي
بحلوك الاودهم والما يرحمون
كل ذرة تراب حريرعلى غطاي
مرات اليموت يريحه اليدفنون