1 _هل تمنيت في يوم ان تكون بنت ؟؟ ولماذا؟
لا طبعا لان افضل الجنس المهيمن على كوكب الارض
بس يجوز بالمستقبل افكر لا اكو منظمات لحقوق المراه وماكو للرجال واكو عيد الام وماكو للاب حسب علمي ولان الشاعر قال يا مسعده وبيتج على الشط ولم يقل يا مسعد وهذه الامور مو هينه ههه

2_ماهو رأيك في البنت اللي تلبس لبس غير محتشم؟
يكلك ابو الامثال المحشش يكول البقره الي تنطيك حليب بلاش ماكو داعي تشتريه , تسر الناظرين ههه
طبعا الامثال تضرب ولا تقاس فالفكره ان انظر اله وما اتزوجه طبعا هو غير جائز النظر بريبه والاسلام طلب بغض النظر ما طلب ان نحاسب الغير محتشمات الا....
بس اكو نقطه احب اوضحه
بالكليه هواي صادفت بنات لا يلبسن حجاب ولا شي بس يا اخي ملابسهن والله بيهن وقار اكثر من هواي بنات لابسات حجاب ومغطايات ومفصلات الملابس على اجسامهن
فالاحترام تستحقه البنت بشخصيته واخلاقه وكل ماترخص نفسه ترخص بغض النظر شنو لابسه او شلون امكيجه وله المكياج يخرج من الاحتشام

3_هل تجذبك البنت التي تضع المكياج عند الخروج؟؟
اكثر شي اكره بالنساء هو المكياج وماعرف ليش خلن مكياج لان بدون مكياج اجمل بهوااااي يعني الي جاي اشوفه ان الحلوات يخلن مكياج حتى يقللن جمالهن خوفا من العين لا اكثر ولا اقل يعني مثلا ياهو احسن الكيكه الي تشتريه من المحل لو الي تسويه بالبيت لحظه هذا مو خوش مثل
طيب مثل ثاني ياهو افضل غابات اصطناعية لو الغابات الطبيعيه اهو هذا هم مو خوش مثل
خلص ماكو مثل يجي بالي المهم المكياج مو حلو وخلص
سابقا جنت اعتقد بس انا ما احب المكياج لكن بعد سؤال ثله من الشباب المكبلين وجدت رايهم مثل راي و2014 من ظهرت الدراسه بهل الخصوص وجانت النسبه الكبيره جدا من الرجال تقول بدون مكياج والبعض اصلا يكره وصلت الى قناعه ان المكياج من اسباب عدم مشاهدة الرجال في الشوارع طلعن البنات متخفيات باقنعة المكياج
اما الكحل فهو خارج المكياج لان حقيقة يجعل البنت جميله جدا جدا اصلا الكحل ايجابي للرجل والمراة بسبب فوائده العظيمه
الي منه تقويه النظر وحدته وجماليه لان سابقا الرجال مو حلوين مثل هسه اما الان ما يحتاجون كحل
اسف نزلت على الترابي جنت جاي افكر ومن انتبهت لكيت صابيعي تكتبت

4_هل من الممكن ان تخطب فتاة ليست من بلدك؟
هذا السؤال بيه عدة احتمالات ولكل احتمال عدة افرع ولكل فرع عدة اجابات
بعض الاحتمالات
هل البنت عراقي الاصل
هل البنت عراقيه الام والاب
هل البنت عراقيه ولدت هناك
هل البنت عراقيه هاجرت بعمر مبكر
هل البنت عراقيه تعرف عربي
هل هي بنت من اهل تلك البلده
هل البنت تعرف عربي
هل البنت يعرفها اهلي
هل البنت اهلي متعاركين ويه اهله
هل البنت عرفته عن طريق النت
هل البنت تملك بيت وسياره
وهل البنت ساكنه بالعراق
والقائمه طويله جدا
طبعا افضل تكون عراقيه

5_هل من الممكن ان تتزوج فتاة اكبر منك سنا؟
لا افضل ذالك
لان النسوان يكبرن بسرعه والروح خضره والمغريات هواي والتعدد وراه عرايك فاختار زغيره وحلوه حتى تلتهي بالامور الاخرى وهنا تجسد نصف الدين مو تفهمون غلط بالزواج من الزغيره نصف بس لان الزواج اذا بقى الانسان يلعب بذيله فهنا ما يعتبر كمل نصف دينه
يكمل نصف دينه من يعوف هل السوالف التعبانه لان ما يحتاج اله بعد او ماعنده عذر ويتوجه للعمل والعباده والتربيه الى ان يصل مرحلة الحق اليقين وهو الموت ويتونه توي على السوالف الي سواها بالخصوص الغيبه هههه
اسف نزلت على الترابي وطلعت خارج الموضوع

6_هل تفضل الزواج التقليدي ام الزواج عن حب؟
افضل الزواج الي مخطط اله سواء عن حب او تقليدي هواي اكو امور يجب ملاحظته قبل الاقدام على الزواج
اكو حديث للرسول جدا لطيف بهل الخصوص يكول تخيرو لنطفكم فان العرق دساس
يعني الانسان لا يستعجل بخصوص الزواج لازم يتمعن مو اي وحده حبه راح خطبه وبنفس الوقت حذرنا من خضراء الدمن
بس المشكله الانسان من يحب يضرب كل هل الامور عرض الحايط وبعد 3 سنين زواج من يختفي الحب حسب الدراسه وحسب ما لاحظت ان المكبلين ينفصلون بعد 3 سنين على الاغلب يكتشف ان مو هذا الانسان الي يريد يعيش وياه بس الفاس وكع بالراس وما ينفع الندم
وبكل الاحوال الرجال قلبه وسيع مثل كراج السيارات شيل اكثير من سياره فيحب المراة سواء بعد الزواج وله قبله ماكو فرق بالتوقيق


7- من تكون المراه التي تقف امامها ضعيفا؟ولماذا؟؟
افضل عدم الاجابه هنا لان تحتاج كركه هواي وخوفا من عدم الرغبه بالقراة لان النقاش هنا يدور عن اصناف النساء ورغبات الرجال

8_ماهو رد فعلك عندما تصارحك بنت بحبها قبل ان تصارحها انت؟وما هو رأيك فيها ؟
ردت فعلي خليط مابين و و و و
راسا ارجع خطوه للوراء
بدهشه
ويصير عندي اضطراببطني
وينخفض ضغطي
وتتصاعد دكات قلبي
ويمطر الجو ويصير هواء قوي هههه لاتصدكون هل الامور قاريه وشايفه بالافلام الهنديه
بالحقيقه احاول ان لا ابدي اي رد فعل المهم تكون ماتخرج بتفسير من يمه وافكر بالموضوع يستاهل لو لا
وبما اني مو انا الي مصارحه يعني ما احبه لو احبه جان صارحته اذا بالاخير مراح تستفاد شي من المصارحه
بس راح تبقى خجلانه كل ما تشوفني
وافضل البنت ما تصارح ولد لان بالحقيقه راح يحس ملكه فما راح يصارحه من حيث هو المسيطر شوكت ما يريد يصارح
ولو هسه هنه خل يبطن يضربنه بواري عود ذيج الساعه ينتقلن لمرحلة المصارحه حتى انتقل لمرحلة افكر

9-أذا وقع نظرك على امراه .. ماهو أول شيء يلفت انتباهك وتنظر اليه ؟؟
العيون
اجمل ما بالمراه العيون والجمال الوحيد الي يدوم للممات
ويا محلى العجايز الي عيونهن حلوه الواحد حتى ما يضوج من سوالفهن
حتى القران رغب المؤمنين بالحور العين يعني الي عيونهن وسيعه وتخبل ماعرف سود او لا بس اتصور سود لان الحور معناها شديد البياض او هيج شي
السمرات حلوه عليهن العيون العسليه الصفر والخضر
والبيض الرصاصيات والسود الكبار او ما يطلق عليه ادعج العين
طبعا انا ما انظر لغير وجه البنت فاذا كانت العيون مو حلوه ما اكرر النظره هي بقت جم حسنه خو ما اروح اصرفهن على الخالي (عمي)


بالختام هذه اجابه مختصره جدا لان الوقت متاخر وله جان اسهبت بعد
وهل الاجابه عن الخجولين كفت وفت هههههه
شكرا