مو هينه بصراحه نطوي اعز كتاب
وامسح كل حروفي واشطب حروفك
مو لعبة وابطل منك وانساك
انه هواي صعبه اكلك انعوفك
مشكلتك تحب اتعيش حته اتعيش
خالي من المشاعـر بارده جفوفك
ماتعرف تقدر واحد انجن بيك
حبك من عذابة وقدر اضروفك
مارادك تواعده بالكلمات
ولا رادك تضمضم عن هلك خوفك
رادك بس حنان تعوضه وبعيناك
يرتاح شكثر من تضحك يشوفك
رادك حته منك ينضر البغداد
يناشد ذكرياته بلمسة جفوفك
رادك للنهايه تعيش بس وياه
اعمه ومايشوف وكامش اجتوفك
اجاك بلا سلاح وبيده شايل ورود
شجاك اتخبلت واذبحته بسيوفك ؟
شمرته بنص بحر عينك بلم مزروف
يتلفت يدور مامش جروفك
دكيت بطبل من شفته بيك يدوخ
وداويته بملح وبهوسة ادفوفك
هذا الي اشتراك ابدمه يا بذات
يشيل خيوط جرحه ويكعد يروفك
هذا انه الوفيت الماخنت فد يوم
هيجي يهون عندك تسحب طيوفك
اذا مرتاح مني روح ضل مرتاح
لا تسأل علي ماريد معروفك
واذا مهموم اذكر جفي لمن جان
يحرس خدك ومدمن عله جفوفك