يحسنه المنج اشرف ماكو وشكيله
بحكومتنه البخت مايل فرد ميله..


ابشرج بالعلن صار النهب والبوگ
وعل الهدمه سهل هسه الجلد مشگوگ
واذا بيتي انهدم هسه الوطن محروگ
وحكومه بلا وطن .... صارت التشكيله


ابشرج صفو ... ماكو كل تنازع دوم
تصافو عل الذبيحه واخذو المقسوم
ونسينه الكهرباء وحتى الاكل والنوم
ياحسنه الحكومه .... لبست الشيله


وع التأجيل هينه ... ننتظر وتهون
هسه فلوس ماكو والعذر مضمون
ردو ع البقه .. ومسحو تره الماعون
وگالو للمواطن ..... تكدر تشيله


فيل ابرهه العدنه ماكو مثله افيال
جذب عند الحكومة يكفرك بكل حال
بس تجارهم صارو رجال اعمال
بهايه اشهد يحسنه صار تعديله


ظل شعبي يحمل عجبته الشغله
طبل عند الحكومة وصارت ادكله
إغٓسِلَوْ مخهم يحسنه وادمنو طبله
ياحسنه الحكومه .... ابليس وبحيله


عكس دينانه تفتر دوم بالمگلوب
بخت عده الحكومه والشعب منكوب
داعش عدنه طبت شفتي هاي انوب
يا حسنه البخت مايل فرد ميله

بقلمي / اسد ...