​رادو بالسجن يا سيدي يذلوك
ونورك يطفه رادو داخل الحفره
لكن بالعكس ما يطفه نور الله
باقي لهسه يضوي بداخل الحضره
ابن جعفر سجين شلون اكول عليك
ما افرض فرض ما اقبل الفكره
صح بيدك سلاسل تاكل من سنين
جوعانه السلاسل وانته ابو الفقره
بلحم ايدك تعزب للقيود اشكال
اصبعك واللحم لو جاعن تبتره
غريب شلون اكولن وانا اعرفك زين
مو حيدر ابوك وامك الزهره
مو قصة سجن لو غربه عايش بيه
بعيونك سجنهم جنه وشكبره
دعيت الله وتريد اتعبده وحدك كون
وضحتلي الحقيقه وبانت العبره
محمد وحده يعبد ربه جان بغار
وانته تريد تعبد الله بالنكَره
كالو بالسجن عايش ظلام وخوف
ويومك ما تعرف بليله من فجره
وتسال عالصلاه صارت بعد لو لا؟
وسجانك يكلك صلي هسه اقره
معقوله الروايه؟ وبالكتب يحجون؟
ما اصدك انا وراح احجي باليجره
جبريل بصلاته استأذنك مولاي
وبوقت الفرض ينزلك تخبره
اشم انا بدعائك ريحة الله وخير
واشوف انا بسجودك فقره عالفطره
يتلمس ترافة جفك وي الريح
شما ترفعهه ايدك خشمي ينتضره
ويا ديرة عواطف يالحنان البيك
اليكَصدك يا امامي تزفه بالبشره
اريد اكَصد الك بس انا ما ادكَ باب
هيج بوجهي افوت وازهكَ الحسره
اجيت امشكبن وتارس شليلي اعتاب
وعليه اصبر يمن ما ينوصف صبره
ليش اختك يصبغ دم ولدهه الكَاع
وجثثهم بالشوارع كلهه متطشره
يا خال الولد بالك على اختك هاي
بغداد العفيفه ام شيلة الخضره