كصتي عين وتبجي لمن تستحي
جنهه دمعة عوز متكبعة بخجل
انا ربك عاجن بروحي الحياء
وما سكنت بيوم ريكان الجبل
انا عالقمه صرت بس مو غرور
القمه عد روحي ولك صدكني تل
كافي لا تعبد بعد صخرة بلال
شفاد ابو سفيان تاليته هبل
عالظهر جفك اجه بلهفة جهال
متاني وكت العيد لو دك الطبل
لهسه ماحكني الجرح بعده بكفاي
الخنجر بطوله وكَف عالجرحي ضل
لا تذب كومة حجي بدرب الظلام
ومن حليم القوم بالك لو زعل
الشمع صح لابس بوجهه الضياء
لكن من يموت يحرك لــــو نزل
ماتهمني بطولك وعرضك هذاك
الورده ورده شما يغطيهه الاثل
كتلك جفوفك جـــرف بالك تصير
يصطرهه خد الماي ويصيرن وحل
بصبري حته البدوي يحلم من زمان
بأبره من اصبر تطيح ايدي الجبل
انا ما اكلك اردهه وهـــايه عيب
هذا مو طبـــــعي واقابل بالمثل
بدمي ورطت انته ادينك من مشيت
وانا وسط البال غاسلهن غسل
ما اكلك انا انســــــه البيه صار
كتله جرحي انساه بس شو ما قبل
(سلام الكَريزي)