بملابسنه أثر لنيابة العوز
وبنصهن أثر ناس احنه باقين

شبه كرصة خبز ركعتنه عالثوب
تشهينه أونوّن هو الخبز وين

شنكل للحبايب هذا موديل
افترض قنعن صفار وجوهنه منين؟

تلهمنه الشماته بهيج مقياس
جكاره وطاحت بحلك المساجين

ومجروحين نرجع فوك الجروح
نواسي امنه الدمعهه اعدال شطّين

يمّه فطور رجلج ترفه والناس
خشنه عيونهه وماشافتج زين

وتذكرنه ابونه النطلع وياه
وعلينه جروح ردّت ذيج السنين

يادرب النطبه وكال مكطوع
حفّاي ونفرّ كل الدرابين

يخاف أنحرجه ثاري الدرب مفتوح
الدرب مكطوع يقصد بي دكاكين!!

ابويه بلايه فيّ لاثمر لاكاع؟
وهو بمسحاته علاهه البساتين

بجه من شاف تعبه أتعبّه بسلال
وخضار السعف طاح بدمعة العين

اليكلي أصبر يجي الماعون متروس
مايدري احنه بعناهه المواعين

نصبّه اعله الجريده وننوي عالزاد
وتزلف عينّه ونقره العناوين

ويّه اللكمه الاولى انذبه ونكوم
اذا كل كلمه بيهه أتلاثه ميتين!

نحس بالناس لكن مايحسون
وعدهم حلوه لو كالوا مساكين

اعله طين ابيوتنه استغرب يقلدون
وهمّه اجسامهم مخلوقه من طين

ملّينه الحجي وملّينه هل الحال
ركض بينه العمر لاح الثلاثين

وماكلك الدين الهامة الراس
الهوه لو ينملك منشمّه بالدين

لأن ضكنه الطعن لبحجي اللسان
وكلنه شوايت الله اعله السجاجين