الى الغائب الحاضر
سانتا كلوز .. الملقب بـ بابا نؤيل ..
راس السنة صارت وانت مامريت !!
زرع يابس ينتظر جيتك سحابة ..
بابا نؤيل ..
نسمع بيك احنه و مانشوفك ليش ؟!
يمعود تعال و فرّح اعيون اليتامه ...
بس لا تروح البيتنه اهناك
تدري احنه اتهجرينه ويه الگرابه ..
و تدري وهسه بيوتنه بنص الخرابة ..
وتدري .. ملك الموت صاحي و ماينام ..
ياخذنه يريد وحاد انيابه ..
بابا نؤيل ..
اطفال العراق اتريدك اشلون !!
ماتگدر تجينه انت معذور
لأن بيت العوز محد يدك بابه ...
بس بأمريكا تهل .. و إتونس الناس ...
يلا ... فرحوا بيك عنه.. بالنيابه !!

يا الـ بابا نؤيل
تدري شلون .. لاتجي
لأن الوضع .. مايسرّٓك من تجي هنا ..
المدارس هي بيت و هي للتعليم ..
و كل يوم انفجار ... أتعج ترابه
ماتسمع خبر بس عن الأموات !!
هذا انقتل .. هذا راح .. و هذا مات
البشر عدنه .. من ينولد .. ميطول هواي
من وعينه اللطم active ... و بشبابه
بابا نؤيل ..
بس .. اطفال العراق .. اليوم ... حيل محتاجيك ..
اليردونه منك ... شي بسيط
لا رادوا هدايا ... ولا لعابه ...
اليردونه منك انه أگلك بي ...
اسمك مو مركب ؟!
سويه نصين ...
نؤيل اخذه الك ... وانطينه بابا ...!!!