قصيدة محاكمة الرمح
للشاعر رعد الأزرقي

يابو عبد الله يالمالك مثيل ... يلي دمك معجزة من المعجزات
اشلون سامحت النهر واذنب عليك ... وانته لو دعيت يتلاشه الفرات
انته دين ومعجزه وتربه وضريح ... شي اكيد اسمك فرض كَبل الصلاة
ياحسين شلون اوصفك ياحسين ... واحنه بيك انوصف انواع الصفاة
ابدمك اتضحي لان دمك طهور ... طهر اسم الدين واسيوف العداة
ظلت اتحوم الفرس يوم الهويت ... وانحنت روس الجبال الشامخات
ادموع فرسك من طحت زحفن عليك ... الطرف شفتك يعتنن متعطشات
اومرن اسهام العده ايسلمن عليك ... واهنه السهام ابذبح متكلفات
مادرو السهام تخجل من حسين ... او مادروالحسين يتمنه الممات
حته يبقى الدين واتظل كربلاء ... اوحته يحتارون في ذكر الرواة
انته اعظم دين وانته اعظم شهيد ... وانته نور من الشمس عالمظلمات
زينب ابدمك درت لاحك نزيف ... شافت انجوم الثريه املطخات
نزل عزرائيل كَلك ياحسين ... الكوثر ايتانيك شلك بالفرات
********************************