انتضرك ترد كطعت كلبي اعليك
ترضه انته اليحبك كلبه يتكطع
وتانيتك تجي واشكد الك تانيت
ما حاسب احساب ابحبك اتولع
يمته اترد عليه العمر عده او فات
عيني ابشوفتك يالغالي ماتشبع
حبك قصتي او بيهه اقره ليل انهار
وملهوفه اعله صوتك بس اريد اسمع
ويلوموني ابمحبتك كل الليشوفون
وانه اكبالهم بعيوني بس ادمع
حسراتي امنجرهن ياكلن بالروح
واتمنه ابغيابك روحي بس تطلع
بعدني الهسه حبك ما جبت طاريه
واحس كل ذكرياتك جاي تتجمع
وحجيت اويه البحر كتله انته هم حبيت
وحق ربك اكبالي الروج ضل يلمع
حته البحر يبجي البحر ما معصوم
من يذكر اجروفه ابمايه يتوسع
عله حب الاحبك ناذرانه انذور
واعوده ابكل سنه او عالفقره يتوزع