ساعه اسكت واگولن هسه راح ارتاح

وساعه اركض واهيجن واتبع آثارك …

ياهيبت نخل شنهي القساوه البيك
ليك بشوگ اجتي تطوف زوارك …
داريتك عمر وبدمعي چنت اسگيك

وصرت بير لحضرتك وادفن اسرارك …

ماضگت الرطب بس نوه حصتي وياك
وللغربه شلع رخصته جمارك …
تلوعني بغيابك ثار مني تريد
شني حرب البسوس الماخلص ثارك؟

وينك بس درد باب العتب مفتوح

واقبل حتى لو كل لحظه نتعارك …
آنه ادري بجحا بسماره دگه اباب
وانت اعله الگلب دگيته بسمارك ...