مشن والنوگ ناگة تسولف لناگة
اذا تهنا اعلى فيّ الرمح نتلاگه
هزّل بس مشينا ويــَ الحسين جروح
رغم بس راس چان وناشفة رياگه
الجرحه حسين عده الدنيا كلها حسين
واليعرفه صدگ ما يحمل فراگه
تكحلنا برماد الخيم مثل الليل
ولبسنا دموع طفلة تصيح مشتاگة
وعثرنا بچم يتيم عيونهم عالراس
اسم الله تصيح زينب للعثر ساگه
ومن بيّن خيال الخدر صاح الجيش
أخت عباس هاي الصعدت الناگة
كلها تصيح طلعت بت الأول
طلعت والهوى البلگاع وشّل
أول مرة تطلع هيبة الگاع
الرمل زلمة وتعجب خاف تزعل
الشمس دارت وجهه تدور غروب
استحت من الخيم بس ما لگت حل
صعب بتراب تعثر بت أبو تراب
التمشي بغير اخوها صعبة تندل
التتنفس علي تخنگها العيون
الورد يم ديرة العاگول يخجل
الموت بلا وجه، بس ياخذ وجوه
وشفت وجه المواقف يبقى أجمل
حلات الجرح من يصير الحسين
وحلاة السالفة بــ ام عون تكمل
البگى براسج يزينب فيّج نباگ
المسافة بين خطوة وخطوة مقتل
المسافة البين ناگة وناگة دخان
المسافة البين طفلة وطفل مقتل
المسافة البين سوط وسوط المتون
المسافة البين جمرة وجمرة مقتل
مسافة جرح زينب طوله عباس
العمر لو ما سگيته بأخو يذبل
عثرت واسمع اسم الله من الأرماح
رغم ما طاح اخوها وبعده يسأل
رد مع اقتباس
المشاركة الأصلية كتبت بواسطة صفاء العامري
