تعودت احجي حجاية الحك
( تعودت احجي حجاية الحك)
يخواني موضوع استفزني وظليت
مالوم منه وبيه الوجن فترة
موضوع سلبي يخص طريق الاسلام
للحط مطبة لو يسوي الحفرة
تعودت احجي حجاية الحك ماخاف
شما جانت لحجيي العواقب خطرة
مقصودة كلها وما كو اي استثناء
لليدعي الدين ويلوذ بكتره
يالتحفر الشارع مقابيل البيت
من كل بناءك زينة هاي الفكرة
تنلعن يومية ويسبوك هواي
لن انت درب الناس جاي اتدمره
عودك تقلل للحوادث مولاي !!
لا بالعكس معكوس فكرك امره
دارجة لو سيارة مسرع يلفيك
مايوكف لطسه ويهم بالعثرة
والله ماظل بيّه صبر ولا حال
من هالنفوس البلفعايل قذره
والبعض خايف ولد لا يندهسون
كام وحفر بالدرب شق شكبره
ادري انت فعلك عنهم ايرد الموت
لو رايد ايدك تلوي ايد القدرة ؟؟
والبعض يحفر من يمد بوري الماي
لبوري ابو الانج تشوفه اخذ نص مترة
ميرد يصلح للمكان الاذاه
لتراب حط سيارة تالي تكسره
تربته تشوفه وسبحته ويحجي الدين
يا دين عمي الدين منك يبره
ارجع لنفسك وانظر لفعلك زين
تقبل لابوك تجيب لعنة لكَبره
يا عمي والله الموش مسلم مبغوض
بس ما يطر درب الخلك لو شعره
يهدم عقيدة مايهدم لدروب
اخلاق عنده وربنه عالم بامره
بالدين احنه مجلبين وياحيف
لاحكامه منطبق ابد بس نقره
****
ناظم الفضلي
رد مع اقتباس
